O Pavillón do Restollal, en Compostela, acolle desde este mércores, 24 de xuño, e ata o 27; a II Jamboree Nacional de Clubs de Minibasket. A concelleira de Deporte, Noa Morales; e o presidente da Federación Galega de Baloncesto, Francisco Martín, ofreceron en rolda de prensa os detalles da competición, que reúne a 24 equipos (12 masculinos e 12 femininos).
O Concello de Santiago e a Federación Galega de Baloncesto organizan esta II Jamboree Nacional de Clubs de Minibasket, cuxo obxectivo é a promoción do baloncesto de base. É a segunda edición deste evento, que reúne os campións e os mellores equipos da categoría minibasket de diferentes federacións autonómicas.
Entendido coma un campionato nacional de carácter oficioso nesta categoría, o calendario ofrece catro días de competición, en quendas de mañá e de tarde durante as tres primeiras xornadas, e tan só de mañá o sábado 27, cando se celebrarán as diferentes finais.
A cidade sede estará representada por ADM Peleteiro, Rosalía Fedesa e Pío XII Fedesa. Xunto a eles estarán nove clubs galegos máis e outros procedentes de Asturias, Navarra, Castela e León, Cantabria e Melilla.
