Obradoiro CAB proclamouse campión da XXVII edición da Copa Galicia Sénior Masculina tras derrotar esta noite a Club Ourense Baloncesto nunha disputada final na que o club ourensán actuou como anfitrión e que congregou no Pazo dos Deportes Paco Paz (Ourense), ao mellor baloncesto galego de pretemporada.
15/09/12 – Pazo dos Deportes Paco Paz – Ourense
(20.00 h) Club Ourense Baloncesto – Blusens Monbus (67 – 86)
(19 – 25, 20 – 17, 10 – 25, 18 – 19)
Árbitro Principal: Jacobo Rial / Árbitro Auxiliar: Daniel Pazos / Árbitro Auxiliar: Cristian Martín
A Copa Galicia reuniu de novo a Obradoiro e COB en torno a unha final. Dous equipos que iniciaron a busca do trofeo tentándose e amosando que a igualdade ía ser a protagonista ata ben entrada a noite.Dende os primeiros compases, as cartas dos santiagueses pasaron polo poderío dos seus interiores. Unha parella, a de Kendall e Junyet, vital para complicar as posibilidades do rival e mermar o seu ataque. E grazas a este argumento, súa foi a superioridade no primeiro cuarto.
Os da cidade das Burgas apelaron dende o minuto cero a un intenso derroche de forzas co que tentar paliar o seu déficit físico e continuar enganchados a un partido que ninguén quería dar por perdido. No segundo cuarto, Rafa Sanz e os seus homes souberon aproveitar as rotacións obradoiristas e, sen Kendall e Junyet en pista, materializaron maior solidez en ataque, deixando ver que as súas opcións permanecían intactas. Sen embargo, nos derradeiros tres minutos, o quinteto santiagués retornaba a balanza a favor dos seus intereses.
Na renovación o encontro rompeuse definitivamente. O bo facer en defensa dos de Moncho Fernández convertíase nun obstáculo real para o COB. Unha traba que se unía á precisión e efectividade de Alberto Corbacho, inapelable no tiro exterior. Esta combinación de factores deixaba a Obradoiro cunha marxe de 18 puntos (49 – 67) e tan só dez minutos para o remate.
O último cuarto sucedeuse entre os xa escasos folgos reinantes e os intentos do COB por manter viva a esperanza. Unha actitude que se viu abaixo polos erros e as imprecisións cometidas. Con este panorama, Obradoiro precisaba de pouco para rubricar a súa vitoria no electrónico (67 – 86) e recoller a súa terceira e consecutiva Copa Galicia.
Previamente, e como agasallo final para os afeccionados que encheron o Pazo, unha impecable tripla de Pablo Posse dende casi media pista certificaba o trunfo sobre a bucina.
Trofeos e Recoñecementos
Oriol Junyet foi o encargado de recibir a Copa Galicia de mans do Conselleiro de Educación, Jesús Vázquez. O capitán obradoirista, feliz por sumar un novo título, era felicitado acto seguido polo Presidente da Federación Galega de Baloncesto, Francisco Martín; así como polas restantes autoridades presentes.
Pola súa banda, o subcampión e organizador da Fase Final desta XXVII edición da Copa Galicia recibía tamén o seu recoñecemento. O esforzo do COB na pista e a súa implicación coa competición acreditouse cun trofeo do que fixo entrega o Secretario Xeral para o Deporte, José Ramón Lete.
 |  |
O MVP completou o cadro de galardóns da noite. Nesta ocasión foi o ala – pívot croata Mateo Kedzo, con 16 de valoración, o xogador escollido como o máis destacado da final. O seu premio, cortesía de “la Caixa” chegaba a través de Pablo Casas, representante da entidade financeira nesta ocasión
