O NBA 3X Tour regresa a Vigo

Este programa itinerante, que permite vivir a experiencia da liga estadounidense, pasará pola cidade o 13 e 14 de xullo.
A NBA e o BBVA, o banco oficial da liga, visitarán Vigo este verán, na que se establece como a súa segunda presenza en tres anos nesta urbe galega.

 

Contando coa colaboración da Federación Galega de Baloncesto, o programa “NBA 3X Tour” traerá á cidade olívica, os próximos 13 e 14 de xullo, o espectáculo do mellor baloncesto do mundo, e farao a través dunha atractiva competición 3×3 coa praia de Samil como escenario.

De xeito completamente gratuíto, todos aqueles mozos e mozas, a partir dos 11 anos, que o desexen poderán forma parte desta particular convocatoria, que conta con prazas limitadas e para a cal a inscrición xa está aberta a través da súa ligazón oficial.

O torneo desenvolverase dividindo aos equipos por franxas de idade (U14, U16 e Open +17), celebrando diferentes encontros dos que extraer aos campións locais, os cales, en categoría Open, terán acceso a participar nas finais nacionais en Bilbao, coincidindo co ‘NBA Global Game 2013’, encontro que enfrontará a Filadelfia 76ers contra Uxue Bilbao Basket (6 de outubro).

“NBA 3X Tour” trasladará así a Vigo unha mestura perfecta de Baloncesto e Diversión composta por un amplo conxunto de actividades deportivas e lúdicas como concursos de slalom e triplas, e exhibicións de free stylers e dunkers, entre outros. Ademais, o evento estará arroupado pola presenza de toda unha lenda NBA, o alero estadounidense Bruce Bowen, ex xogador de San Antonio Spurs, tres veces campión da NBA e cinco veces no mellor quinteto defensivo desa liga

Comparte:

Facebook
LinkedIn
Email
WhatsApp
Telegram