O Concello de Tui homenaxea aos seus deportistas na II Gala do Deporte Tudense

Mañá venres, 29 de novembro, ás 20.30 horas, no Teatro Municipal Tudense, levarase a cabo a segunda edición da Gala do Deporte Tudense, na que se recoñecerá o traballo realizado polos deportistas e clubs durante este ano 2013.

Nesta segunda edición, o xurado encargado de decidir os galardoados estivo integrado por Nicolás Lorenzo, concelleiro de Deportes de Tui; Rosendo Bugarín, médico e deportista tudense, colaborador con varios clubs e probas deportivas no noso concello; Enrique Míguez, padeeiro e medallista olímpico; Eduardo Sousa, xerente deportivo, que foi presidente e adestrador do Club Kayak Tudense, árbitro de baloncesto da primeira división nacional, e comentarista deportivo en diferentes medios de comunicación; e Justi Peixoto, director do programa deportivo “Escoita Deporte” da RMT.

Todo está preparado para o que quere ser a gran festa do deporte do noso concello; o punto e seguido dun ano cheo de moito traballo e moitos éxitos acadados por todos e cada un dos clubs tudenses.

A gala contará coa actuación de tres grupos deportivos, que xunto aos vídeos dos premiados e o homenaxe a distintas persoas que traballaron en pro do deporte tudense durante moitos anos, conformarán un acto sinxelo e emotivo.

Dado que o aforo do teatro é limitado e dirixido aos deportistas e clubs tudenses, as entradas non retiradas ás 20.20 poñeranse a disposición do público xeral a partir desa hora.

Comparte:

Facebook
LinkedIn
Email
WhatsApp
Telegram