O Comité Galego de Árbitros remata o ano 2013 xestionando a programación do seu tradicional Clínic de Nadal, cita dirixida aos colexiados galegos do Grupo 1 e que se celebra, de xeito habitual, nestas datas festivas.
Nesta ocasión, a indicada convocatoria terá lugar o vindeiro catro de xaneiro, nas instalacións do Colexio Manuel Peleteiro, en Compostela. A partir das 09.30 h desa data, 45 integrantes do Comité Galego reuniranse nesta sede para ser partícipes de diferentes ponencias teórico-prácticas e realizar as imprescindibles probas físicas e test de regras.
O Director Técnico do Comité Galego de Árbitros, colexiado ACB e internacional FIBA, Miguel Ángel Pérez Pérez; será o encargado de dirixir as actividades a realizar no marco deste Clínic, estendendo a súa responsabilidade tamén como referencia para as charlas e coloquios que se levarán a cabo. Xunto a el, e compartindo tamén a tarefa de guiar as ponencias, comparecerán dous dos seus compañeiros ACB, dos que en vindeiras datas coñeceremos a identidade.
Plan de traballo
Exercicios Teóricos e prácticos, enfatizando a parcela física e cuestións como o control de partido, protagonizarán o plan íntegro de traballo da edición 2014 do Clínic, no que non faltará tampouco a convivencia.
O programa completo que afrontarán os nosos colexiados preséntase como segue:
09:30 h PRESENTACIÓN
09:45 h TEST DE REGRAS
10:30 h PROBAS FÍSICAS
11:15 h RESUMO TÉCNICO DE METADE DE TEMPORADA
12:00 h DESCANSO
12:15 h CONTROL DE PARTIDO (EXPOSICIÓN DE TRABALLOS)
13:30 h DESCANSO
13:45 h CONCLUSIÓNS
14:30 h XANTAR
