A Federación Galega de Baloncesto, a través da súa Área de Adestradores, parcela en constante movemento, presenta a “Plataforma de Mellora do Adestrador Galego”.

Na busca de ofrecer escenarios formativos óptimos aos adestradores máis novos da nosa Comunidade, a FGB activa esta “Plataforma”, na que o seguimento e titorización dos seus participantes será crucial.

Da man de técnicos referente, e co ideario docente FGB como pauta, o estamento Deportivo FGB abre a posibilidade de ser parte de este novo proxecto, no que se dignificará a labor do adestrador como tal, dotando aos seus membros dunha mentalidade axeitada ao campo no que actualmente se moven.

Estrutura: 16 membros
A “Plataforma de Mellora do Adestrador Galego” emerxe como un foro pechado que busca a 16 técnicos residentes en Galicia, e que no momento presente se atopen en activo. Serán oito homes e oito mulleres que poderán acceder a este programa completamente de balde.
Formar parte do mesmo dependerá dun proceso de selección para o cal, xa se pode solicitar, dende hoxe mesmo, a participación.

Candidaturas: prazo aberto
Todos os interesados en presentar a súa candidatura deben cumprir uns requisitos mínimos, así como facer chegar á FGB (adestradores@fegaba.com), antes do vindeiro 25 de marzo, a súa solicitude oficial a través do formulario establecido para tal fin.

Poderán optar á “Plataforma de Mellora do Adestrador Galego” aqueles adestradores e adestradoras que entren no seguinte perfil básico:

– Ano de nacemento desde 1984 en adiante.
– Estar apto, como mínimo, no Curso de Nivel 0 (INICIACIÓN) en titulacións outorgadas pola Federación Galega de Baloncesto dende o ano 2010 ata a actualidade.
– Ter licencia como adestrador nas tres últimas temporadas nalgún club adscrito á FGB en categorías de Formación.

Configuración Final
O nome dos 16 membros elixidos pola Área Deportiva FGB para configurar a “Plataforma de Mellora do Adestrador Galego” comunicarase sempre a partir da data límite para a presentación de candidaturas, a xa indicada do 25 de marzo.

Posteriormente, este ilusionante proxecto formativo comezará a rodar no inicio do mes de abril, estendendo a súa primeira fase ata xuño do ano 2015.

“Plataforma de Mellora do Adestrador Galego”: formulario oficial para a presentación de candidaturas