A Área Deportiva da Federación Galega de Baloncesto habilita a posibilidade de obter horas de formación para os alumnos dos seus Cursos de Iniciación, Nivel I e Nivel II a través da participación no I Clinic Blusens Monbus-FGB “Desmontando ao Adestrador Axudante”.

Este novidoso evento formativo, organizado pola propia FGB e por Obradoiro CAB, reunirá en Compostela (Polideportivo de Santa Isabel) os vindeiros 26 e 27 de xullo a un carte de luxo composto por seis adestradores axudantes de primeiro nivel que abordarán diferentes temáticas:

– Hugo López (Real Madrid): “O scouting nun equipo que xoga dobre competición”.

– Victor Pérez (Blusens Monbus): “O scouting do propio equipo”.

– Chechu Mulero (Valencia Basket): “Técnica individual aplicada ao Pick and roll en xogadores exteriores”.

– Gonzalo Rodríguez (Blusens Monbus): “Distribución de roles no corpo técnico”, “Distribución do traballo en pista”.

– Alessandro Magro (Montepaschi Siena): “Traballo individualizado enlazado co equipo”.

– Miguel Calero (Asvel Villeurbanne): “Traballo para a mellora de técnica individual defensiva en novas promesas”.

O traballo dos seis relatores dividirase nun programa que aquí se achega e a través do cal os alumnos dos cursos de adestradores FGB poderán obter 10 horas de formación se asisten durante as dúas xornadas de xeito completo ou catro horas se o fan só na data do venres, 26 de xullo.

Inscricións
Todos os interesados poderán formalizar a súa inscrición no Clínic de xeito presencial nas oficinas de Obradoiro CAB SAD, ou a través de internet vía correo electrónico á dirección clinic@obradoirocab.com.

A cota a ingresar para dar validez á inscrición é de 20 € para o público en xeral, aínda que seguindo a liña habitual de descontos e vantaxes, os abonados do Blusens Monbus e adestradores principais federados pagarán 15 € e os accionistas e adestradores axudantes con licenza na Federación Galega de Baloncesto tan só 10 €.