Campionato de España Infantil 2014: Galicia, de volta a casa

Galicia remata a súa particular experiencia na edición 2014 do Campionato de España de Seleccións Autonómicas Infantís. Ambos os nosos combinados pecharon este sábado a súa participación e a súa vivencia nunha cita que, de seguro, non esquecerán.

Madrugando para afrontar o último partido do seu percorrido, compareceron esta mañá (09:00 h) os nosos infantís ante Asturias para culminar con vitoria este Nacional (67 -50) de Seleccións. O equipo de Miguel Ángel Hoyo completaba así a súa clasificación final co 5º posto do Grupo Preferente, categoría na que Galicia volverá a competir o vindeiro ano.

Pola súa banda, as xogadoras, ainda ledas polo seu encontro do venres ante Extremadura no que salvaron a súa Praza en Grupo Especial, animaron ao seus compañeiros, celebrando tamén o seu oitavo posto na clasificación.

Tanto xogadores e xogadoras, como os seus respectivos corpos técnicos, viaxan xa cara Galicia coa sensación de ter participado nun evento único nas súas carreiras deportivas e de ter compartido grandes momentos dentro e fóra da pista. A todos eles, dende a FGB, trasladar a nosa noraboa e o noso agradecemento polo seu compromiso para co noso Baloncesto.

Non esquecer tampouco a figura da afección, dos pais, adestradores e clubs locais, que no día a día traballan para que estes 24 xogadores poidan chegar a ser parte dun Campionato de España. 

Coñezamos cales son os seus últimos resultados, así como as estatísticas que ofrecen os mesmos:

Web oficial do campionato: http://campeonatoinfantilbaloncesto2014.es/

Resumo 2º Xornada: xoves, 17/04/14

SELECCIÓN GALEGA INFANTIL FEMININA. Grupo Especial “B”

(Galicia, Cantabria, Cataluña, Andalucía e Canarias)

18/04/2014 – 5º XORNADA

(10:00 h) Canarias – Galicia (59 – 33) (estatística)

Último partido do fase de grupos ante un equipo canario moi físico e que suscitou unha zona que se lle atragantou ás galegas.

Empezou o partido igualado, con intercambio de canastras durante os primeiros 5 minutos. O claro dominio do rebote canario permitiulles ter moitas segundas opcións e axudoulles a acabar o cuarto cunha vantaxe de 15-10.
A zona rival fixo sufrir ás galegas que non eran capaces de anotar e estrelábanse contra as xogadoras canarias. Esta situación, sumada ao traballo isleño no rebote defensivo, seguía permitíndolles demasiadas segundas opcións a Canarias e así marchábase ao descanso cunha clara vantaxe de 33-19.
Non cambiaron as cousas na renovación: as Canarias dominando o rebote en ambos lados e as galegas fallando demasiado e, aínda que o intentaban, os seus folgos eran demasiado escasos para frear a ampla vantaxe que tiñan en contra (50 – 28)

O derradeiro cuarto foi de puro trámite para ambas as escuadras e o resultado parcial do mesmo (9-5) é clara mostra diso.

Mal partido das galegas, demasiados erros na defensa e no rebote, así como o desacerto no tiro.

(10:00 h) Cataluña – Andalucía (59 – 63) (estatística)

Clasificación Final. Grupo Especial B: 1º Andalucia, 2º Cataluña, 3º Canarias, 4º Galicia e 5º Cantabria

18/04/2014 – CRUCES CLASIFICATORIAS (en xogo: evitar o descenso de grupo)

(17:30) Galicia – Extremadura (41 – 40) (estatística)

Xogábanse moito as galegas, xa que o perdedor deste partido perdía a praza no Grupo Especial. Os nervios foron evidentes durante todo o partido.

Non empezaron moi cómodas as galegas, non atopaban o seu ritmo e o cansazo xa empezaba a facer mella e afectar á claridade de ideas. Abundaron os seus erros en canastras que parecían fáciles e a concesión de puntos sinxelos para un rival que era rápido e guerreiro. (9 -14)

As cousas non melloraron no segundo cuarto. Continuaban as imprecisións, os erros debaixo do aro, demasiadas faltas….e, visto o visto, o resultado era moi curto para o pouco ofrecido polas galegas.

O equipo de Armando Otero confiaba recuperarse tras o descanso, pero ao regreso dos vestiarios o panomara non fixo máis que empeorar. Máis problemas en defensa permitían anotar con facilidade ás extremeñas, que se creceron e cun parcial de (7-15) deixaron as cousas moi complicadas para os derradeiros 10 minutos.

Chegados a este punto, todo semellaba demasiado complicado, pero xusto aquí chegou o sprint galego. O noso combinado, con varios acertos desde a liña de 3 e roubos de balón, á desesperada, na presión. desfacía a distancia e metíase no partido a falla de 5 minutos.

Con só catro puntos abaixo, apareceu o bloqueo extremeño, contrastado polo ultimo empurrón galego, vital para o decisivo final vitorioso. Dous tiros libres para poñerse por diante con tan só 45 segundos por xogar propiciaron o intre máis intenso e emocionante do partido, un instante vital para conservar a tan prezada praza no Grupo Especial.

SELECCIÓN GALEGA INFANTIL MASCULINA. Grupo Preferente “C”

(Galicia, Ceuta, Melilla, Castilla La Mancha e Cantabria)

18/04/2014 – 5º Xornada

(12:00 h) Galicia – Ceuta (77 – 20) (estatística)

Comezou o partido coa cabeza dos nosos posta aínda no encontro da tarde do xoves ante Cantabria. Galicia compareceu ante Ceuta moi descentrada e imprecisa nos primeiros minutos, con perdas de balón e imprecisións.

A pesares de sumar canastras en contrataques e de que a diferenza no marcador crecía con contapingas a seu favor, as sensacións non foron positivas ata os últimos instantes do primeiro cuarto. Uns dez minutos que acabaron cun parcial de 29 – 2.

Era preciso mudar a actitude para avanzar e recuperar e esta premisa cumpriuse no segundo cuarto. Moito máis metidos nos encontro, os xogadores de Miguel Ángel Hoyo amosaron unha próspera actividade no 1×1 que forzaba erros no rival e contraataques fáciles para os intereses galegos. Ao descanso a situación escrarecíase maís cun amplo tenteo: 55-8.

De regreso na pista, os últimos vinte minutos de xogo serviron para sacar rédito positivo de diferentes probas, tanto ofensivas como defensivas. Galicia continuaba a xestionar ben a súa estratexia.

Malia a que a anotación foi menor nesta segunda metade de encontro, o cómputo global da mesma resultou ben satisfactorio. Eliminando, unicamente, algúns erros defensivos puntuais en canto a concentración se refire, Galicia pechaba a súa cita cunha vitoria necesaria pero non suficiente para poder pasar ao cruce de semifinais.

A súa clasificación final neste Campionato de España de Seleccións Infantís virá determinada agora pola cita que os enfrontará ante Asturias, maña sábado, as 09:00 h.

 (12:00 h) Castilla La Mancha – Cantabria (67 – 50) (estatística)

Clasificación Final, Grupo Preferente C: 1º Castilla La Mancha, 2º Cantabria, 3º Galicia, 4º Melilla e 5º Ceuta.

19/04/2014 – CRUCES CLASIFICATORIAS (3º PM “C” – 3º PM “D”)

(09:00 h) Galicia – Asturias (67 – 50) (estatística)

 

Comparte:

Facebook
LinkedIn
Email
WhatsApp
Telegram