O C.B. Arxil saca de novo o Baloncesto á Rúa no seu tradicional “Día do Baloncesto – 3×3”, actividade que celebra neste 2013 a súa XII edición. A cita é este xoves, 13 de xuño, na pontevedresa Avenida de Montero Ríos.
A entidade da cidade do Lérez reunirá nesta festa do “3×3” a 950 nenos e nenas de entre 1º e 6º de primaria, unha cifra récord de participantes que chegarán procedentes de diferentes colexios da zona: CEIP Campolongo, CEIP Froebel, CEIP Manuel Vidal Portela, CEIP Praza de Barcelos, CEIP San Benito de Lérez, CPR Calasancio, CPR Ntra Señora de los Dolores, CPR San José e a Asociación Virgen de la O.
A XII edición do Día do Baloncesto “3×3 na Rúa” activará os seus mecanismos para que todos se sintan como na casa desfrutando do deporte, e para iso contará coa colaboración da Federación Galega de Baloncesto e de diferentes institucións entre as que se atopan o Instituto Municipal de Deportes de Pontevedra, o Concello de Pontevedra, Visita Pontevedra, a Deputación Provincial de Pontevedra, a Secretaría Xeral para o Deporte, Supermercados Froiz, NovaGaliciaBanco, Feiraco, Diario de Pontevedra e Mafari Café.
