As xornadas técnicas do Comité Galego de Árbitros vinculadas ao Baloncesto Base recolleron os seus primeiros froitos esta mesma fin de semana coa celebración das Fases Finais da Copa Galicia Júnior e Minibasket.

Baixo a coordinación de seis colaboradores CGAB, un total de 16 colexiados repartidos en función da categoría de xogo, afrontaron nestas citas un completo programa de traballo que incluíu competición, reflexión e posta en común de erros e dúbidas.

Os participantes nesta primeira mostra da formación continua do CGAB tomaron a mesma como toda unha oportunidade de aprendizaxe, valorando a posibilidade de, “pulir a súa arbitraxe para o futuro “, destacando a “análise do criterio e as súas flutuacións durante o transcurso do encontro”, tal e como o expresa Rubén Solla, colexiado presente na Fase Júnior Masculina.

Fase Final Júnior Masculina

Así mesmo, o control de partido focalizou tamén parte da atención dos colexiados revelándose, en palabras de novo de Rubén Solla, como “un apartado no que é preciso que melloremos moitos de nós”.

As sensacións de Rubén compárteas o seu compañeiro Mitka Paulius, pertencente ao Grupo Sub 23 e presente no seu caso da Fase Final Minibasket Masculina. Para Paulius o fundamental deste tipo de convocatorias é acumular “experiencia para os próximos partidos”, cuestión á que axuda o “pitar con compañeiros doutros comités”.

En feminino

Na Fase Final Júnior Feminina destacou a designación composta integramente por colexiadas, unha experiencia novidosa nas competicións FGB e que resultou, se cabe, unha motivación a maiores para as implicadas: Paula Lema, Saray Fornos, Patricia Díez e Veva Piñeiro.

Precisamente, esta última, a viguesa Veva Piñeiro, destacou o satisfactorio da experiencia compartida coas súas compañeiras, analizando xunto a elas e aos técnicos FGB cuestións de criterio e de mecánica: “Obtés diferentes puntos de vista e opinións que te axudan a mellorar”.