– Aranzana compartirá preto de dúas horas cos adestradores galegos que desexen achegarse ata a cidade das Burgas o vindeiro sábado, 15 de setembro. A súa visita engádese aos actos previos á gran final da Copa Galicia Sénior Masculina, a celebrar en Ourense nesa mesma data.

– A inscrición nesta actividade pode tramitarse a través do enderezo electrónico adestradores@fegaba.com, solicitando a participación e indicado nome e club actual.

– A Área de Adestradores da FGB validará a participación neste Clínic por dúas horas de formación práctica para aqueles alumnos dos Cursos de Nivel I e Nivel II.

Coa Fase Final da XXVII Copa Galicia como marco, e completando os eventos paralelos que encherán Ourense de baloncesto a vindeira fin de semana, a FGB activa un Clínic formativo orientado a adestradores e establecido para o vindeiro sábado, 15 de setembro, no anexo ao Pazo dos Deportes Paco Paz (17.00 h).

Gustavo Aranzana será a prestixiosa figura que guiará esta actividade. A súa experiencia e percorrido, con, entre outras, máis de 15 temporadas ACB no seu haber e presenza en Seleccións Nacionais, avala a posta en marcha deste Clínic, no que a “Continuidade Dinámica no xogo de Ataque: Chegar desde a Defensa” será o contido principal da súa intervención.

Inscrición
A FGB abre a participación no Clínic a todos aqueles adestradores que o desexen, establecendo unicamente o requisito previo da súa inscrición vía mail. No enderezo adestradores@fegaba.com recíbense xa a partir desta tarde as solicitudes, nas que se debe indicar nome e club de pertenza. A data límite para tramitar este proceso é a do venres, 14 de setembro.

Todos aqueles inscritos que acudan a Ourense e están a formar parte dos Cursos de I e II nivel da área de adestradores da FGB poderán validar esta actividade por dúas horas de formación práctica.