A dous meses da celebración da cuarta edición do Pequebasket, a Escola Basket Xiria comeza con todo o entusiasmo a preparación da actividade, orientada para nenos e nenas de toda Galicia e de idades comprendidas entre os 5 e os 8 anos.
Un ano máis, o Pequebasket celebrarase o día 17 de maio, coincidindo co Día das Letras Galegas, día festivo en toda a Comunidade. O equipo organizador deste Día do Pequebasket está metido xa de cheo na programación da xornada nos seus aspectos lúdico, festivo e deportivo.
Neste senso, Diego Vázquez Reino, Presidente do club; Arturo Ferraces, Director Deportivo de Escola Basket Xiria; e Marcos Díaz Molk, membro da xunta directiva; mantiveron unha reunión na Federación Galega de Baloncesto que resultou moi frutífera.
Na xuntanza, na que participaron o presidente da FGB, Francisco Martín; a entidade federativa expresou o seu total apoio á iniciativa, considerada xa como un evento de referencia autonómica.
A Federación Galega está completamente implicada coa Escola Basket Xiria para impulsar esta actividade, que novamente reunirá en Carballo a máis de cincocentos nenos de 5 a 8 anos para desfrutar dunha xornada multideportiva, lúdica e festiva co baloncesto como pano de fondo.
