As dependencias do Concello de A Estrada acolleron este martes a posta de longo da que será a gran festa do Baloncesto Base Galego, e que terá lugar, precisamente, nesta localidade o domingo, 2 de xuño.

Da man do rexedor local, José Carlos López deuse a coñecer o conxunto de actividades que encherán ata a bandeira o Pavillón Manuel Coto Ferreiro e os seus accesos e que terán ao Minibasket e o Preminibasket como eixo : a Fase Final das Ligas FGB Minibasket e Preminibasket, o Programa Plaza 2014 e a Fase Final do “B3 Escolar – la Caixa”

O alcalde estradense estivo acompañado nesta ocasión polo presidente FGB, Francisco Martín; a Deputada de Deportes da Deputación de Pontevedra, Begoña Estévez; o presidente do E.D.M. Estradense, Alfonso Sanmartin; e o representante de “la Caixa” en A Estrada, Herminio Cabero.

Todos eles reuníronse para convidar aos xogadores de A Estrada e a todos os nenos e nenas galegos a que se acheguen este domingo ata a vila pontevedresa e gozen das tres citadas actividades, as cales, como ben recoñeceu o máximo mandatario FGB,” non serían posibles sen o esforzo e o apoio que as institucións públicas, tanto Concello, como Club local e Deputación de Pontevedra están a achegar”. Igualmente, Francisco Martín, non esqueceu a, colaboración de “la Caixa” presente de novo apoiando ao Baloncesto Base a través da súa Obra Social.

Dende o propio Concello quixo agradecerse a confianza depositada na súa capacidade organizadora por parte da FGB, e non se dubidou, do éxito de convocatoria e promoción económica que a visita deste trío de eventos suporá para a localidade.

O compromiso para que todo saia a pedir de boca está feito, e mentres o domingo non chega, dende Concello e E.D.M. Estradense trabállase a reo, tal e como indicou Alfonso Sanmartín, “para que todo o mundo poida desfrutar dunha magnífica xornada”.