– O Pavillón do Pombal, en Cambados, será testemuña da cuarta convocatoria da “Aula Formativa do Adestrador Galego”, consolidando este programa formativo dinamizado pola Federación Galega de Baloncesto e Obradoiro CAB e no que levan participado xa máis de cen adestradores.
– Os protagonistas e encargados de dar contido a esta nova charla son os técnicos galegos Manuel Felpeto e Rubén Domínguez
Obradoiro CAB e Federación Galega de Baloncesto retoman neste novo ano 2013 o pulso do seu proxecto común: a “Aula Formativa do Adestrador Galego”. Ambas as institucións activan a cuarta charla dentro deste marco, a celebrar o vindeiro 27 de xaneiro en Cambados.
Nesta ocasión os técnicos galegos Manuel Felpeto e Rubén Domínguez compartirán cos asistentes as súas experiencias en torno a dúas temáticas sempre de interese: o “scouting aplicado ao adestramento” e as “claves para dirixir un grupo”, respectivamente.
Programa horario e Inscrición
A sesión impartirase a partir das 17.00h do indicado 27 de xaneiro. Felpeto será quen a inaugure, dando paso, ás 18.30 h, á quenda de Rubén Domínguez, coas claves para comandar un equipo.
Como en todo o ciclo de charlas propostas ata o momento por Obradoiro CAB e Federación Galega de Baloncesto, a participación é totalmente aberta e de balde, unicamente precisando que os interesados envíen os seus datos persoais a adestradores@fegaba.com
A presenza nesta actividade poderá validarse por cinco horas de formación práctica para todos aqueles alumnos dos Cursos de Adestradores de Nivel I e II impartidos pola Federación Galega de Baloncesto.
